फूल भएर जन्मिनै
भूल गरेछु !
मुटु भित्रै
सुकाएर कामना,
हृदय भित्रै
लुकाएर भावना,
म फेरि माटोमै झरेछु....
कसैको श्रृंगारले
मन मेरो लियो कि !
कसैको केशमा
अल्झिने मन थियो कि !
सुहागरातको सजावट बनेर
या फूलदानीमै सजेर
प्रिया रिझाउने जीवन थियो कि ।
बाहिर म हाँस्थें,
हृदय प्यासा थियो कि !
आशा थियो कि,
अभिलाषा थियो कि !
सोधेन कसैले
काँडामाथि सजिएर
किन मुस्काऩ छरेंछु ?
फूल भएर जन्मिनै भूल गरेछु ।
No comments:
Post a Comment